Tíðindi

Kæru Neistafólk.
Komið við í 85 ára føðingardagsveitslu 12. Mars kl. 19.30 í B36-húsinum! 
Á skránni verður:
- Góður matur – 3 rættir.
- Undirhald
- Góður dansur við Chill
Hetta kann vera “startskotið” til Partille Cup. Har vit sum foreldur, avvarðandi, leikarar og onnur kunnu hugna okkum saman, koma at kennast betur, og frameftir kunnu standa sterkari saman.
Nevndin vónar sjálvandi at undirtøkan verður góð .

Meldið til við at senda teldupost til neistin1931@gmail.com. Til ber eisini at boða frá á tlf. 218480.
Tilmeldingarfreistin er leygardagin 5. mars 2016 og aldursmarkið er 18 ár.

Kæru Neistafólk.
Komið við í 85 ára føðingardagsveitslu 12. Mars kl. 19.30 í B36-húsinum! 

Á skránni verður:
- Góður matur – 3 rættir.
- Undirhald
- Góður dansur við Chill

Hetta kann vera “startskotið” til Partille Cup. Har vit sum foreldur, avvarðandi, leikarar og onnur kunnu hugna okkum saman, koma at kennast betur, og frameftir kunnu standa sterkari saman.
Nevndin vónar sjálvandi at undirtøkan verður góð .

Meldið til við at senda teldupost til neistin1931@gmail.com.
Til ber eisini at boða frá á tlf. 218480.

Tilmeldingarfreistin er týsdagin 1. mars 2016 og aldursmarkið er 18 ár.

Eingin ivi man vera um, at tað sat í høvdinum á spælarunum hjá báðum pørtum, at vit høvdu trý mál at lora av, tá seinna hálvfinalan millum kvinnurnar hjá okkum og grannunum var á skránni í dag. Sjálvandi royna spælarar altíð at siga sær sjálvum, at talvan er rein undan dystinum, men í hálvfinalum er líkt til, at seinni dysturin altíð skal verða framúr spennandi.

Frá byrjan var tað Kyndil, sum setti seg á tað mesta. Tær grønu tóktust grammari enn okkara, alt fyri eitt vóru tvey mál á muni. Ein munur, sum at kalla helt sær allan dystin. Onkra tíð togaðu vit okkum upp, so eitt mál var á muni, og onkra tíð toygdi Kyndil munin upp í trý mál, men so heldur ikki meira.

Vakurt hondbóltsspæl var ikki tað, sum vigaði mest í dystinum. Kyndil hevur seinastu ferðirnar roynt seg við rættiliga kontantum spæli móti okkum, og hesa ferð var einki undantak. At kalla allan fyrra hálvleik tóktist hetta eisini rigga hjá teimum grønu. Okkara spælarar høvdu dekan ov góðan hug at bakka undan í nærdystunum, og tað er ikki nøkur serliga góð uppskrift, um tú vilt vinna eina hálvfinalu. Eftir steðgin ljósnaði eina løtu. Serliga fingu vit væl fatur á verjupartinum, og hóast talan ongantíð gjørdist um nakra málveitslu, so ótu vit so líðandi at annars hóttandi stóru leiðsluni hjá Kyndli.

Ikki minst átti Marjun Danberg sín stóra leiklut í hesum. Allan dystin á tamb var hon stóra álopshóttanin hjá okkum. Seks ferðir av seks møguligum skoraði hon við brotskasti, umframt at hon eisini negldi fimm bóltar inn í opnum spæli. Týdningarmesti av hesum mundi helst koma, tá knappliga tríggir minuttir vóru eftir á talvuni. Vit fingu støðugt nógvar útvísingar í dystinum, og hesa løtuna spældu vit fýra móti seks. Tvey mál vóru á muni, og tí var spenningurin í heldur størra lagi. Spælt varð væl og leingi í álopinum, og so var at royna uppstilling, tá dómararnir dømdu tríggjar-metrar og samstundis lyftu armin á loft. Her steinaði Marjun bóltin í netið til 16-15. Ikki bara var hetta ein ordans uppercut til tær grønu, sum annars høvdu sæð sær møguleikan at økja til trý mál. Hetta merkti samstundis, at Kyndil nú skuldi vinna við fýra málum, og so noyddust tær at forcera seinastu løtuna.

Tað gjørdi ikki nervarnar minni, at vit fyrst sløsaðu eitt álop burtur, umframt at Eirikur var somikið mælskur, at bonkurin fekk tveir fingrar. Men Kyndil kom ikki nærri enn til 17-15. Fríða hevði ikki tann heilt stóra dystin í málinum hesaferð, men hon stóð ísakøld, tá Turið Arge skuldi lobba av veinginum, og so kláraðu vit at halda á mál. Aftur hesa ferð eru vit í steypafinaluni, har mótstøðuliðið hesaferð verður VÍF. Eingin ivi er um, at vit tá skulu toga annað og betri spæl fram, um vit skulu hava gullið. Men vit bæði vóna og trúgva, at spælararnir klára at betra um avrikið til ta tíð.

So er spurningurin bara, um tað verður tvær ferðir Neistin á finaludegnum. Menninir hava truplan setning, tá teir taka móti StÍF í morgin. Strandingarnir vunnu fyrra dystin við fýra málum, men tað er nú ikki øll verðin í einum hondbóltsdysti, so øll blá hondbóltshjørtu hava allar góðar orsøkir til at fara niðan í høllina í morgin kl.15.00

Kyndil-Neistin 17-15 (10-7)
Neistin í finaluna við samanlgt 32-31

Málskjúttar hjá Neistanum: Marjun F. Danberg 11(6), Birita Jacobsen 1, Eir Berg 1, Nicoleta R. Hansen 1, Brynja Høj 1

Í sera spennandi hálvfinalu í steypakappingini vann Neistin í gjár ta fyrru grannauppgerðina móti Kyndli. Dysturin endaði við 17-14 sigri til Neistakvinnur.

Eins og í teimum undanfarnu landskappingardystunum millum Neistan og Kyndil hetta kappingarárið, var sigurin fingin í hús við sterkari verju og góðum málmansspæli. Álopsspælið riggaði hinvegin ikki væl, og harafturat vórðu nógvir málmøguleikar brendir.

Kyndil legði bragdliga fyri og kom á odda 2-0. Hjá Neistanum gekst striltið at skora, og fyrsta málið kom ikki, fyrr enn 6 minuttir vóru spældir. Men so kom glið á hjá Neistanum, samstundis sum Kyndil hevði trupult við at skora.

Tá farið var til hálvleiks, var Neistin á odda 11-7, og líkt var til, at Neistakvinnur fóru at renna frá Kyndli. Men so varð ikki. Í 12 minuttir miðskeiðis í seinna hálvleiki fekk Neistin einki mál, og brádliga var leiðslan minkað niður í 1 mál. Tá 2 minuttir vóru eftir av dystinum, var støðan 15-14 til Neistan.

Neistakvinnur vardu manniliga og forðaðu Kyndli í at skora seinastu minuttirnar. Samstundis megnaði Neistin at skora 2 mál afturat, og kvinnurnar hava sostatt eina trímáls leiðslu undan seinnu hálvfinaluni, sum verður leygardagin. 

Fyri Neistan gjørdu Lilja Mohr og Marjun Danberg 4 mál hvør, Eir Berg gjørdi 3 mál, Birita Jacobsen fekk 2 mál, og Jacklin Durhuus, Drós Ragnarsdóttir, Brynja Høj og Nicoleta Hansen skutu 1 mál í part.

Í trý korter høvdu vit einki sum helst at siga í grannauppgerðini, men brádliga vaknaðu menninir, og so var um reppið, at stig vórðu bjargað úr vónleysari støðu

Orðið “jólaferia” er vælsaktans tað, sum best lýsir avrikið hjá okkara monnum fyrstu drúgvu løtuna av grannauppgerðini móti Kyndli.

Væl vita vit, at navnalistin hjá Kyndli telur størri nøvn enn tey á okkara lista, men hinvegin hava vit upp til fleiri ferðir prógvað, at sami navnalisti í sjálvum sær ikki nýtist at hava tað heilt nógva at siga. 

Tá er týdningarmiklari, at menn standa saman sum eind, og at stríðsviljin altíð verður hildin í hásæti, men tað var nú so sum so við hesum fyrstu 45 minuttirnar ella so í dag.

Eina lítla løtu fylgdust liðini, men longu um miðjan fyrra hálvleik kom avgerandi løtan í dystinum. Tað vilja altíð koma løtur í einum dysti, har alt ikki gongst eftir vild. Stóra kynstrið í hesum løtum er at halda høvdið kalt, og at finna fram til onkran form fyri grundspæl, so rútman aftur kann koma inn á liðið.

Hetta gloymdu vit fullkomuliga seinna korterið av fyrra hálvleiki. Ferð eftir ferð varð bólturin tveittur burtur, tí menn ikki vóru nóg neyvir, ella tí tol ikki varð víst í álopspartinum, og frá 5-5 endaði hálvleikurin við 15-9 leiðslu til teir grønu.

Hetta gjørdi støðuna mest sum vónleysa, og í gott korter eftir steðgin vóru eingi tekin um broyting. Støðan var nú 23-14 til Kyndil, men brádliga ressaðust okkara við. Tað tóktist eisini, sum var orkan við at ganga undan hjá mótstøðumonnunum, og so kundu vit eta av leiðsluni.

Tað gjørdist til eina kapprenning móti klokkuni, men ólukkutíð gingu sekundini akkurát ov skjótt. Vit skoraðu átta mál á rað seinastu 13 minuttirnar, og sjálvandi iðra vit okkum um, at vit ikki onkra einstaka aðra ferð høvdu hepnið við okkum, so úrtøkan kundi verið eitt stig ella bæði tvey.

Tað tænir okkara monnum til rós, at vit soleiðis stríddu okkum aftur, tá alt annars sá púrasta vónleyst út. Men veruleikin er eisini, at vit fyrst og fremst kunnu takka okkum sjálvum fyri vónleysu støðuna. Tað kostaði ov nógv, tá vit undan steðginum mistu tamarhaldið á bæði okkum sjálvum og dystinum í drúgt korter.

Men vit kunnu altso væl og virðiliga brúka seinasta korterið av dystinum sum prógv fyri, at vit hava eitt lið, sum ikki gevur upp, hóast tað sær svart út. Verður tann hugburðurin galdandi komandi umførini, er eingin sum helst ivi um, at vit meira enn tí einu ferðina fara at arga onkran av teimum, sum stríðast um pláss í FM-finalunum. Og hvør veit, um vit ikki eins og í fjør kunnu gera eitt gott hál í steypakappingini.

Neistin-Kyndil 22-23 (9-15)

Málskjúttar hjá Neistanum: Rói Berg Hansen 9(3), Teis Horn Rasmussen 4, John í Innistovu 2, Jugoslav Djumic 2, Beinir Davidsen 2, Andras Joensen 1, Terji Mørk 1, Sjúrður Thomassen 1

Við sterkari verju og góðum málmansspæli eydnaðist tað í dag Neistakvinnum at vinna toppdystin móti Kyndli. Sigurin hevur við sær, at Neistin nú er 3 stig frammanfyri Kyndil, sum er á øðrum plássi í Hvonndeildini.

Álopsspælið var hinvegin einki at prála av í óvanliga málfátæka dystinum, sum endaði við 16-11 sigri til Neistan. Tað vóru nógvar tekniskar villur og brendir málmøguleikar í hópatali, og stórar partar av dystinum kláraðu hvørki Kyndil ella Neistin at fáa mál.

Tá góðir 10 minuttir vóru farnir av dystinum, var Kyndil á odda 5-3. Men seinastu 18 minuttirnar av fyrra hálvleiki megnaðu Kyndilskvinnur ikki at fáa bóltin framvið Fríðu Petersen, sum stóð sera væl í Neistamálinum. Tá dómararnir bríkslaðu fyri hálvleiki, tyktist Neistin at vera væl á veg móti enn einum sigri á grannunum. Hálvleiksstøðan var 10-5 til Neistan.

Men spenningur kom aftur í dystin í seinna hálvleiki, har Neistin ikki fekk nakað mál í knappliga eitt korter. Tá seinni hálvleikur var hálvrunnin, var leiðslan hjá Neistanum minkað niður í 2 mál. Neistakvinnur fótaðu sær kortini aftur seinastu 15 minuttirnar, samstundis sum Kyndil bara fekk 1 mál seinasta korterið, so endaliga støðan gjørdist 16-11.

Hetta er fyrstu ferð í hesum kappingarárinum, at eitt lið í Hvonndeildini bara hevur skorað 11 mál í einum dysti. Fýlast kann tí ikki á málmansavrikið og verjuspælið hjá Neistanum. Tað sama kann ikki sigast um álopsspælið, sum riggaði illa í dag.

Besti málskjútti hjá Neistanum var Marjun F. Danberg við 5 málum. Eir Berg og Nicoleta Hansen skutu 3 mál hvør, Jacklin Durhuus 2, og Lilja Mohr, Ása Dam á Neystabø og Brynja Høj gjørdu 1 mál í part.

Næsti landskappingardysturin hjá Neistakvinnunum verður móti botnliðnum VB sunnudagin 10. januar. Dysturin verður spældur í Vági.
 

NEISTAKVINNUR AFTUR Á ODDA Í HVONNDEILDINI

Eftir sannførdandi sigur á Stjørnuni í dag, hava kvinnurnar hjá Neistanum aftur lagt seg á odda í fremstu deildini. 

Neistakvinnurnar høvdu eina heldur trilvandi byrjan í dystinum í dag. Stjørnan fylgdi væl við meginpartin av fyrra hálvleiki, men seinastu minuttirnar fyri hálvleik eydnaðist tað Neistanum at leggja seg fram um við fimm málum.

Góða gongdin fyri hálvleiksstegðin helt fram, tá seinni hálvleiki byrjaði. Fyrstu minuttirnar av seinna hálvleiki økti Neistin leiðsluna til 17-8, og dysturin var at kalla longu avgjørdur.

Endaliga úrslitið gjørdist 30-19 til Neistakvinnur, sum sostatt eru fremstar í Hvonndeidlini, nú farið er í jólafrí.

Allir 11 útileikararnir á dómaraseðlinum hjá Neistanum komu á máltalvuna í dag. Besti málskjútti var Eir Berg við 10 málum. Drós Ragnarsdóttir, Jacklin Durhuus, Marjun Danberg og Ása Dam á Neystabø skutu 3 mál í part, Lilja Mohr og Birita Jacobsen fingu tvey mál, og Brynja Høj, Barbara Nólsoy, Nicoleta Hansen og Barbara Johannesen skutu eitt mál hvør.

Nú 11 av 20 dystum eru spældir í Hvonndeildini, er Neistin fremst við 19 stigum. Í hølunum á Neistanum er Kyndil við 18 stigum. VÍF er á triðja plássi við 14 stigum. StÍF og Stjørnan hava 6 stig, og aftast er VB við 3 stigum.

Næsti dystur á skránni hjá Neistakvinnum er toppdysturin móti Kyndli tann 3. januar 2016.

• Súna Mørk, forkvinna
• Marin Augustinussen, næstforkvinna
• Barbara Høj, kassameistari
• Sylvia Berg Johansen, skrivari
• Andrea Heindriksdóttir, nevnarlimir
• Maria í Akrabyrgi, nevndarlimir

Tiltakslimir eru:

• Kristianna Mohr
• Jacobina Kjærbæk
   

Sunnudag 25.okt kl. 14.30 Stíf-Neisitin, Hvonn
Mikudagin 28.okt Kl. 20.00 Stíf-Neistin, FTZ

Bæði kvinnur og menn hava truplar útidystir á skránni um vikuskiftið

Leygardagin skulu kvinnurnar til Vágs, har VB altíð hevur ein sera sterkan heimaskansa. Higartil hevur VB bert spælt tann eina dystin í Hvonn-deildini, og hann varð taptur. Tí er einki at ivast í, at tær eru svangar eftir einum sigri.

Hinvegin eru okkara kvinnur ósigraðar higartil, og vónandi stendur tann veruleikin eisini við leygardagin.

Dysturin hjá kvinnunum byrjar kl.15.00, leygardagin. 

Menninir skulu til Kollafjarðar, har KÍF tykist væl á veg til at líkjast liðnum, sum fyri tveimum árum síðani domineraði føroyskan hondbólt.

Heilt á mál eru kollfirðingarnir langt ífrá komnir, men nýggi venjarin tykist hava fingið spælararnar í røttu venjingina, og øll vita vit jú, at kollfirðingar altíð berjast til tað seinasta. So er at vóna, at okkara menn gera tað sama, og at nógvir áskoðarar taka ferðina gjøgnum tunnilin, so stuðulin verður av tí besta.

Dysturin hjá monnunum byrjar kl.16.00, sunnudagin

Góðan dyst!

Minihondbóltur hjá Neistanum byrjar mánadagin eftir heystfrítíðuna

Nú byrja vit skjótt aftur við minihondbóltinum hjá Neistanum

Minihondbóltur er fyri børn í aldrinum 2 til 6 ár, bæði gentir og dreingir

Venjingartímin í ár, er sum undanfarna ár, mánadag kl.17 til 18 í Skúlanum við Løgmannabreyt.

Fyrstu ferð vit hittast er mánadagin 19.oktober kl.17.00

Hjartaliga vælkomin!

Neistin

vit eru á Facebook