Nýggjan málmann

02.08.2020

Neistin hevur gjørt eina eitt ára avtalu við ein málmann frá Ungarn, sum skal spæla við besta liðnum hjá neistamonnum komandi kappingarár 2020/21. Umframt at spæla sjálvur, skal hann verða málmansvenjari hjá ungdóminum og málverjunum á besta kvinnuliðnum.

Bence Godor er 20 ára gamal, føddur í okt. Í 1999 í Sárbogárd í Ungarn. Bence hevur tvey yngri systkin, sum bæði spæla kurvabólt. Bence byrjaði at spæla hondbólt, tá hann var 9 ára gamal. Tá hann var 12 ár fór hann á hondbóltsskúla í Veszprém og sum 14 ára gamal fór hann á hondbóltsakademi í Veszprém. Bence var í Veszprém í 5 ár, har hann spældi fleiri dystir í 1. Div. Seinasta kappingarár spældi Bence við HE-DO Bbraun Gyongyos í 1. Div. Bence hevur verið partur av ungarska ungdómslandsliðnum øll ungdómsárini.
Bence brennir fyri hondbóltinum og gleðir seg at gera mun í Neistanum. Bence vil gera alt fyri at vísa sína styrki og ynskir saman við málmanstoyminum at halda áfram at menna sínar førleikar, sum málmaður. Bence kemur til landið mánakvøldið 3. August.

Neistin ynskir Bence hjartaliga vælkomnan í felagið og gleða vit okkum til nýggja samstarvið.
Blátt er Gott.

NICHOLAS FERÐ VÍÐARI Á SÍNI HONDBÓLTSLEIÐ

18.07.2020

Nicholas Satchwell flytir við familjuni til Íslands. Nicholas skal spæla við KA í Akureyri í bestu íslandsku deildini komandi kappingarár saman við Áka Egilsnes og Allan Norðberg.

Nicholas Satchwell, sum er partvís eingilskmaður og partvís dani kom til Føroyar at spæla hondbólt við Neistanum í 2015. Tað varð skjótt greitt, at Neistin hevði gjørt sáttmála við ein sera dugnaligan málmann. Longu í 2016 varð Nicholas kosin besti málmaður í bestu deildini í føroyskum hondbólti. Nicholas hevur verið Neistanum ein tryggur aftasti skansi øll árini. Hann hevur verið framúr góður og hevur mangan meir ella minni stongt málið. Nicholas hevur verið ein av stóru profilunum á besta mansliðnum hjá Neistanum og hevur við sínum ótroyttiliga ágrýtni klára at hildið støðið, sum tí eisini endaði við, at Nicholas bleiv úttikin til føroyska A-landsliðið, sum hann eisini hevur røkt fyrimyndarliga væl. Nicholas brennir fyri hondbóltinum og hevur hondbóltsfelagið Neistin merkt hettar aftur bæði á vøllinum og ikki minst í 
felagskapinum, sum hevur so ótrúliga nógv at siga, fyri, at eitt hondbóltsfelag skal virka væl. Umframt at verða ein góður hondbóltsleikari, hevur Nicholas eisini megnað sera væl at laga seg til føroysku viðurskiftini og hevur upp á stutta tíð lært seg føroyskt. Hann bæði skilir og tosar føroyskt.

Nicholas sigur sjálvur soleiðis:
Tey seinastu árini hava nøkur feløg uttanlanda víst mær áhuga. Eg verði liðugur at læra nú í juni mánaða og tí haldi eg, at tað er rætta tíðin at royna nýggjar avbjóðingar. 
Eg tosaði bæði við venjaran í KA og við Áka og Allan, sum hava spælt í felagnum tey seinastu árini. Hettar sannførdi meg um, at felagið KA er ambitiøst og hevur eitt gott 
venjingarumhvørvi. KA hevur verið akkurát ov stutt til at koma í endaspælið tey seinastu kappingarárini, men hevur sum mál at verða millum átta tey bestu komandi kappingarár.
Hóast korona gjørdi endan av kappingarárinum annarleiðis, vil eg fegin siga stóra takk fyri allan stuðul gjøgnum míni 5 kappingarár bæði sum venjari og leikari í Neistanum – tað hevur verið ein sonn fragd. Eg gleði meg at fylgja við, hvussu leikur ferð í framtíðini og síggja, hvussu liðið og hvør einstakur leikari mennist.
Blátt er Gott.

Vit í Neistanum vilja takka Nic fyri tíðina hann hevur ríkað okkum við nógvum góðum løtum á vøllinum og eisini fyri hansara góða íkast sum venjari á dreingjasíðuni. Vit gleðast um, at tú, Nic, nú hevur fingið nýggjar avbjóðingar, hóast saknurin verður stórur. Vit ynskja tær og familju alt tað besta í Íslandi og vóna, at vit einaferð um nøkur koma at síggja teg í Neistanum aftur. Síggjast.

Einaferð Neistin – Altíð Neistin

DÁNJAL TIL SKANDERBORG

10.07.2020

Ein av allarbestu leikarunum á besta mansliði hjá Neistanum ferð nú av landinum at royna seg hondbóltsliga. Dánjal verður partur av hondbóltsfelagnum Skanderborg.

Dánjal Ragnarsson er 19 ára gamal, uppvaksin í Havn og hevur frá tí hann var smádrongur spælt hondbólt í Neistanum. Dánjal hevur ment seg nógv tey seinastu árini og hevur hann verið ein av profilunum á besta mansliðnum hjá Neistanum seinasta kappingarár. Dánjal er bakspælari, men hevur eisini roynt seg á vonginum og er hann kendur fyri sítt “drive” móti
málinum, skjótleika og ikki minst at skjóta mál.

Dánjal sigur sjálvur soleiðis:
Seinasta árið havi eg havt ætlanir um at fara av landinum at spæla hondbólt. Tað hevur gingist væl seinasta kappingarár og fleiri feløg hava víst áhuga. Eisini havi eg verið og royndarvant í Noregi. Beint eftir at steypafinalurnar vórðu spældar í februar komu fleiri tilboð, m.a. frá SHEA akademinum í Skanderborg. Teir bjóðaðu mær at koma at hyggja eftir umstøðunum, og eftir vitjanina har, varð eg sannførdur um, at hettar var ein góður møguleiki fyri, at eg kundi mennast víðari.
Endamálið hjá SHEA er at menna leikarar og hava tey drúgvar royndir og góð úrslit at vísa á, so eg eri glaður um at hava fingið hendan møguleikan. Umstøðurnar har eru góðar og nógvir góðir venjarar eru knýttir at staðnum, so eg vóni at fáa nógv burturúr.
Eg skal búgva á akademiinum og verði knýttur at hondbóltsfelagnum í Skanderborg, har eg skal spæla við teirra U19 liði. Vanligt er, at tey sum ganga á SHEA, umframt at fáast við hondbólt, eisini ganga í skúla, men av tí at eg bleiv studentur nú í summar, fari eg ístaðin at arbeiða.
Eg síggi hettar árið á SHEA sum eitt gott fundament at fáa. Eitt gott stað at byrja og gleði meg at sleppa í eitt professionelt hondbóltsumhvørvi, har hugsað verður um menning av tí einstaka leikaranum fyrst og fremst. Vónandi fer hettar árið at geva nógv, so eg uppá sikt fái øguleikan at spæla hondbólt á hægst møguligum støði frameftir.

Vit í Neistanum gleðast um, at Dánjal nú fær nýggjar avbjóðingar, hóast at stórur saknur verður í honum í tí bláu neistatroyggjuni komandi ár. Neistin takkar Dánjali fyri hansara stóra íkast til felagið bæði sum spælari, venjari og persónur.

Einaferð bláur – Altíð bláur innast inni :)
Vit ynskja tær, Dánjal, alt tað besta og spennandi verður at fylgja tær á tínari framtíðar hondbóltsleið.

Venjaratoymið hjá SMS liðnum hjá Neistanum er óbroytt.

10.07.2020

Nevndin í Neistanum er sera fegin um at kunna kunngerða, at Venjaratoymið frá 2019/20 hjá okkara besta kvinnuliði heldur fram Í 2020/21, sum er Kári Horn, Flemming Raben og Eirikur H Magnussen. Hettar venjaratoymið hevur samstarvað og virkað sera væl saman við leikarunum og felagnum sum heild. Vit gleða okkum til enn eitt kappingarár við teimum við róðrið og ynskja vit Kára, Flemming og Eirikur góðan arbeiðshug og góða eydna.
Nevndin

D18, G16, D14 og D12 í FAXEKONDI-FINALUNI

13.02.2020

Leygardagin 15. Feb. og sunnudagin 16. Feb. eru teir stóru og festligu hondbóltsdagarnir í HH, har spælt verður á tí gula gólvinum fyri nógvum áskoðarum.

Faxekondi-finalurnar bæði hjá teimum vaksnu, ungu og børnunum verða leiktar hetta vikuskiftið. Høllin verður prýdd og innrættað til høvið. Tveir dagar, har hondbólturin er í hásæti,
har fólkið fær góðan og spennandi stemning at merkja.

Neistin hevur ein sølubás í høllini. Selt verður m.a. suppa v/flutes, sandwish, sodavatn, vatn, kaffi, te og góðgæti. Gleða okkum at fáa høvið at hjálpa tykkum at nøkta bæði
góma og búk.

D18, G16, D14 og D12 hjá Neistanum hava spælt seg í finaluna. Vit ynskja teimum bestu eydnu og vóna at síggja nógv blá fólk á áskoðarabonkinum til teirra finaludystir.
Møtið fjølment og stuðlið okkara liðum.

Koyr á Neistin. Blátt ER Gott

Okkara lið spæla hesar tíðir:

Leygardagin 15. Feb.

Kl. 19.30 D18 Neistin – H71 b

Sunnudagin 16. Feb.

Kl. 15.00 D12 H71 – Neistin
Kl. 16.50 D14 H71 – Neistin
Kl. 17.50 G16 Kyndil - Neistin

NIGHT CUP 2019

23.10.2019

Hósdagin og fríggjadagin í heystferiuni var árliga Night Cup tiltakið í Vestmanna. Frá Neistanum luttóku G10, G12, D12a, D12b og G14. Í Night Cup er hondbólturin í hásæti, men tann sosiali parturin fyllir eisini nógv og skapar samanhald.

- G10
G10 vóru við fyri fyrstuferð. Tær vóru 7 gentur á liðnum. Tær hugnaðu sær og høvdu tað gott saman. Genturnar høvdu ikki roynt seg í Night Cup áður, so tær vóru spentar. Tær hildu tað verða sera kool, at navnið bleiv rópt upp, tá man skoraði. G10 gjørdu bart í Vestmanna. Vunnu allar dystirnar sannførandi og vunnu gull.
Stina Madsen og foreldur tóku sær av G10 neistaliðnum.

- G12
Á G12 liðnum, sum var til Night Cup, vóru 9 gentur. Hettar var eitt blandað lið og genturnar sluppu at royna seg á vøllinum. G12 blivu nr. 3 í bólkinum, men taptu bara 2-1 ímóti vinnandi liðnum í einum spennandi dysti, har tær stríddust manniliga. Ein góður túrur í Vestmanna, har genturnar bæði fingu avbjóðingar hondbóltsliga og hugnaðu sær saman.
Lovisa Niclasen var við sum venjari.

- D12
D12 megnaðu at luttaka við tveimum liðum í ár. Tvey sterk lið og bæði kláraðu seg væl.
D12a gjørdu ikki mætari enn at vinna gull. Spældu móti H71 í finaluni og vunnu fult uppiborið. Eitt sera flott liðavrik. D12b vóru bólkaðir í tí sterkasta bólkinum av trimum. Teir vunnu
klárt tann fyrsta dystin og taptu síðan móti H71 a og Víf a, sum fara at kappast í toppinum í A-bólkinum. Neistin D12b spældu væl upp ímóti teimum bestu og sást stór menning á liðnum. Gilli Lorenzen og Eyðun R. Jensen vóru við sum venjarar.

- G14
G14 hjá Neistanum høvdu 13 gentur á liðnum hendan dagin. Tær kláraðu seg væl í teirra bólkaspæli. G14 vunnu tveir dystir á Stjørnuni og ein móti Víf. Javnt bleiv í stigum millum nr. 1 og nr. 2 í bólkinum og skuldi málmunurin avgerða vinnaran í bólkinum. Boð komu frá dómaraborðinum, at Neistin hevði málmunin og var tí í finaluni. Genturnar vóru glaðar og spentar og byrjaðu at hita upp.......men løtu seinni komu boð um, at ein roknifeilur varð
gjørdur og at Víf átti finaluplássið og ikki Neistin. Genturnar fingu ein rutsjebanatúr sum vildi nakað. Gleði og sorg alt í einum. Tættari einari finalu kann man tó valla koma enn G14 gjørdu
hendan dagin. 
Jóhannes Bjørgvin var við sum venjari.

Nevndin takkar tykkum øllum fyri at hava umboðað Neistan so flott og virðiliga. Hjartaliga tillukku til vinnararnar G10 og D12. Sera væl kempa øll somul. Vit gleða okkum at fylgja tykkum nú kappingin ferð at byrja.

NEISTIN LUTTEKUR Í FREGATCUP

06.09.2019

Neistakvinnurnar eru farnar til Danmarkar á venjingarlegu.

Neistahópurin telur 16 fólk. Venjingarlegan er frá 4.-9. Sep. 
Nógv er á skránni. M.a. samansjóing, teambuilding, venjingar og dystir.
Neistakvinnurnar eru tilmeldaðar luttøku í eini hondbóltskapping í Ebeltoft í Jútlandi, sum eitur Fregatcup. Hettar er eitt stevnu-vikuskifti, har øll liðini, sum luttaka fáa innivist frá 6.- 8. Sep. Danir kalla stevnuna fyri eina “Senior kvalitetsstævne”. Fregatcup syrgir fyri gisting, mati, sosialum tiltøkum, høll at venja í og tryggja 4 dystir. Kappingin byrjar leygarmorgunin 7. Sep. Okkara kvinnur spæla kl. 10.00 dk tíð móti Øresund Håndbold.
Venjaratoymið, sum er við, er Kári Horn, Flemming Raben, Eirikur Magnussen og Guðrun Horn.

Neistamenn høvdu eitt venjingarlegu vikuskifti í Tórshavn seinasta vikuskifti.
Nógvar venjingar vóru á skrá. Neistarúmið varð karmur um hugna við góðum mati og fyrireiking til komandi kappingarár. Venjingarlegan endaði við einum venjingardysti móti VÍF, sum Neistamenn vunnu 31-27.

Lionsbikarið verður spælt í vikuskiftinum og okkara menn luttaka.
Dysturin verður spældur í Hoyvíkshøll leygardagin 7. Sep. Kl. 18.00, H71 – Neistin

Síggjast í høllini.

Neistin
Blátt er Gott